Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro), ayaa galabta booqasho qoto dheer ku tagay saddex goobood oo taariikh, xusuus iyo qiime gaar ah u leh Dawladda iyo shacabka Israa’iil. Goobahan oo ku yaalla magaalada Jeruusaalem ayaa kala ah: Mount Herzl, Yad Vashem (Xarunta Xusuusta Gumaadkii Yuhuudda), iyo Groves of Nations.
Booqashadan ayaa qayb ka ah dhisidda buundooyinka dublamaasiyadeed iyo fahamka taariikhda guud ee labada qaran, iyadoo si weyn loo maamuusay weftiga Madaxweynaha.
Geed Lagu Beeray Beeraha Caalamiga Ah (Groves of Nations)
Intii uu Madaxweynuhu ku guda jiray booqashada goobta Groves of Nations, wuxuu halkaas ku beeray geed astaan u ah qaranimada, nabadda, iyo xiriirka saaxiibtinimo ee sida rasmiga ah ugu ugu bilaabmay Somaliland iyo Israa’iil. Tallaabadan ayaa ah caado dublamaasiyadeed oo heer sare ah, taas oo madaxda caalamka ee booqata dalkaas ay kaga tagan raad taariikhi ah.
Madaxweyne Cabdiraxmaan Cirro ayaa qoraal uu soo saaray ku yiri: “Booqashadani waxay ahayd fursad muhiim ah oo lagu xusayo taariikhda, laguna fahmayo xusuusta iyo muhiimadda ay goobahani xambaarsan yihiin.”
Muhiimadda Saddexda Goobood ee la Booqday
- Mount Herzl: Waa xabaalaha qaranka ee Israa’iil, waxaana lagu aasay madaxdii dalkaas iyo aabayaashii asaasay dhaqdhaqaaqa Yuhuudda.
- Yad Vashem: Waa madxafka iyo xarunta rasmiga ah ee loo sameeyey xusuusta iyo daryeelka dadkii ku shahiiday gumaadkii Holocaust.
- Groves of Nations: Waa qeyb ka mid ah kaynta Jeruusaalem, halkaas oo madaxda caalamka ay ku beeraan geedo si ay u muujiyaan nabadda iyo iskaashiga caalamiga ah.
Booqashada goobahan astaanta u ah dhibaatadii iyo soo-kabashadii shacabka Israa’iil ayaa muujinaysa xiriirka qotada dheer ee ka dhashay booqashadan taariikhiga ah ee uu Madaxweynaha Somaliland ku joogo dalka Israa’iil.
